Kote MOUN yo?
Maten-an m leve map poze tet mwen kek kesyon. M pa ret kwè map jwenn repons. Men yo toumante m e m vle pataje yo ak nou.
Map mande m kijan yon peyi ki te pwodui Jan Jak Desalin, Tousen Louvèti, Kristòf, Chalmay Peral, ki te pwodui Antenò Fimen, Leslie Manigat, ki pwodui Laënnec Hurbon, Dany Lafériere, Fritz Dorvilier ka fè rive pwodui Fresner Dorcin, yon minis yo souflete nan manigans tikoulout, epi kontinye ap fonksyone nòmalman nan pòs li. Kijan peyi sa-a fè rive pwodui Madan Morquette, minis kondisyon fanm ak dwa fanm, ki pa gen kouraj ekri prezidan an apre betiz li a nan miragwàn pou denonse sa, oubyen remét demisyon-l imedyatman piske pawòl degradan mouche a remete an kesyon itilite ministè lap dirije a. Kijan peyi sa fè pwodui Gregory Mayard Paul ki tèlman kwè peyi a pa gen moun, desann byen ba, nan fon nèt pou eseye defann betiz sya. Eske peyi a sispann pwodui MOUN? Eske MOUN yo kache? Eske MOUN yo pè? Eske yo fin touye tout MOUN yo? Eske MOUN yo wont?
kote MOUN yo? Kote MOUN yo te ye lè Loran Lamòt te di ap gen kouran 24/24 an jiyè aprè sa li di se pa sa l te di a. Radyo vizyon 2000 pase 2 band sonò kote mouche a ap di 2 pawol kontradikywa yo. Kote MOUN yo?
Listwa rapòte, Prezidan Richard Nixon te oblije demisyone nan lane 1974 aprè l de fin bay pep meriken manti sou koze Watergate la. Isit nou tap jis di " se pa anyen. Se pa premye fwa moun bay manti". Pa two lontan, premye minis fransè Manuel Valls te blije mande pep fransè a eskiz paske l te bay manti sou depans vwayaj li te fè ak kòb Leta a. Kote MOUN yo le prezidan Mateli te Kwipe sou jounalis la an dirèk la paske l
Te poze l yon kesyon ki pa nan gou l? Sila ki tap aplodi yo eske se MOUN yo ye? Eske sosyete pa nou an pa gen MOUN? Lè wap ranpe dèyè pouvwa eske w se MOUN? Lè wap aplodi yon "
Prezidan" kap salanbe yon fanm piblikman, eske w se MOUN?
Kote MOUN yo? M pa wè MOUN yo...
Joe Well Fanfan